Published:10 May 2026 6 AMUpdated:10 May 2026 6 AM
விவசாயத்தில் விதை என்பது அடிப்படை மற்றும் இன்றியமையாத உள்ளீடாகும். ஒரு பயிரின் மகசூல், தரம் மற்றும் உற்பத்தித்திறன் ஆகியவை பெரும்பாலும் விதையின் தரத்தைப் பொறுத்தே அமைகின்றன. மண்வளம், நீர்ப்பாசனம், உரங்கள் மற்றும் பயிர் பாதுகாப்பு முறைகள் முக்கியமானவை என்றாலும், தரமான விதைகள் இல்லாமல் அவற்றின் முழுப் பலனையும் பெற முடியாது. ‘நல்ல விதை பாதி விளைச்சல்’ என்ற பழமொழி இதன் முக்கியத்துவத்தை எடுத்துக்காட்டுகிறது.
விதை என்பது மரபியல் தகவல்களையும், முளைப்புத் திறனையும் தன்னகத்தே கொண்டுள்ள உயிருள்ள பொருளாகும். தரமான விதைகளைப் பயன்படுத்துவதன் மூலம் 15–20 சதவீதம் வரை கூடுதல் மகசூல் பெற முடியும். எனவே, உயர்தர விதை உற்பத்தி என்பது அதிக உற்பத்தி, உணவுப் பாதுகாப்பு மற்றும் விவசாயிகளின் வருமான உயர்விற்கான அடித்தளமாக விளங்குகிறது.
தரமான விதைகளின் நன்மைகள்
தரமான விதைகள் அதிக முளைப்புத் திறனையும் சீரான பயிர் வளர்ச்சியையும் உறுதி செய்கின்றன. அவை நோய் மற்றும் பூச்சி தாக்கத்தைக் குறைப்பதுடன், வறட்சி மற்றும் சுற்றுச்சூழல் அழுத்தங்களைத் தாங்கும் திறனையும் மேம்படுத்துகின்றன. இதன் மூலம் மகசூலும் விளைபொருளின் தரமும் உயர்கிறது. மேலும், மறுவிதைப்பு மற்றும் பயிர் பாதுகாப்புச் செலவுகள் குறைவதால் விவசாயிகள் அதிக இலாபம் பெற முடிகிறது. எனவே, தரமான விதைகள் அதிக உற்பத்தி, பொருளாதார முன்னேற்றம் மற்றும் உணவுப் பாதுகாப்பிற்கான அடித்தளமாக விளங்குகின்றன.
தரமானவிதைகளின் பண்புகள்
ஒரு விதை தரமானதாக கருதப்படுவதற்கு பின் வரும் பண்புகள் அவசியம்.
1. மரபியல் தூய்மை (Genetic Purity): விதை அதன் உண்மையான ரகத்தின் பண்புகளை முழுமையாகக் கொண்டிருக்க வேண்டும். பிற ரகங்களின் கலப்பு இல்லாமல் இருக்க வேண்டும்.
2. உடல் தூய்மை (Physical Purity): மண், கற்கள், தழைத்துண்டுகள், களைவிதைகள் மற்றும் பிற பயிர்விதைகள் போன்ற அசுத்தங்கள் இல்லாமல் இருக்க வேண்டும்.
3. அதிக முளைப்புத்திறன் (Germination Capacity): விதைகள் நிர்ணயிக்கப்பட்ட தர நிலைகளுக்கு ஏற்ப அதிக சதவீதத்தில் முளைக்க வேண்டும்.
4. விதை வீரியம் (Seed Vigour): விதைகள் வேகமாகவும் ஒரே மாதிரியாகவும் முளைத்து வலுவான நாற்றுகளை உருவாக்க வேண்டும்.
5. நோய் மற்றும் பூச்சி தாக்கமின்மை: விதைகள் நோய் மற்றும் பூச்சி தாக்கத்திலிருந்து பாதுகாக்கப்பட்டிருக்க வேண்டும்.
6. சரியான ஈரப்பதம்: சேமிப்பிற்கு ஏற்ற ஈரப்பதம் மட்டுமே விதைகளில் இருக்க வேண்டும்.
விதை உற்பத்தியின் நிலைகள்
விதை உற்பத்தி நான்கு முக்கிய நிலைகளைக் கொண்டுள்ளது:
கருவிதை (Nucleus Seed) – தாவர இனப்பெருக்க நிபுணரால் உற்பத்தி செய்யப்படும், 100% மரபியல் தூய்மையுடைய அடிப்படை விதை.
வளருநர் விதை (Breeder Seed) – கருவிதையிலிருந்து ஆராய்ச்சி நிறுவனங்கள் அல்லது தாவர இனப்பெருக்க நிபுணர்களின் மேற்பார்வையில் உற்பத்தி செய்யப்படும் உயர்தர விதை.
அடிப்படை விதை (Foundation Seed) – வளருநர் விதையிலிருந்து விதைச் சான்றளிப்பு அமைப்பின் கண்காணிப்பில் உற்பத்தி செய்யப்படும், உயர்ந்த மரபியல் மற்றும் உடல் தூய்மை கொண்ட விதை.
சான்றளிக்கப்பட்ட விதை (Certified Seed) – அடிப்படை விதையிலிருந்து உற்பத்தி செய்யப்பட்டு, சான்றளிப்பு அமைப்பால் அங்கீகரிக்கப்பட்டு விவசாயிகளுக்கு விநியோகிக்கப்படும் விதை.
விதை உற்பத்தி தொழில்நுட்பங்கள்
1. சரியான ரகத் தேர்வு:
அதிக மகசூல், நோய் எதிர்ப்புத்தன்மை மற்றும் உள்ளூர் காலநிலைக்கு ஏற்ற ரகங்களைத் தேர்வு செய்வது உயர்தர விதை உற்பத்தியின் முதல் படியாகும்.
2. நிலத் தேர்வு:
வளமான, நல்ல வடிகால் வசதியுள்ள மற்றும் முந்தைய பருவத்தில் அதே பயிரின் வேறு ரகம் பயிரிடப்படாத நிலத்தைத் தேர்வு செய்ய வேண்டும்.
3. தனிமைப்படுத்தல் (Isolation):
விதையின் மரபியல் தூய்மையைப் பாதுகாக்க, விதைப் பயிர் வயலை மகரந்தச்சேர்க்கை ஏற்படுத்தக்கூடிய பிற வயல்களிலிருந்து பரிந்துரைக்கப்பட்ட தூரத்தில் அமைக்க வேண்டும்.
4. விதைப்பு மேலாண்மை:
பரிந்துரைக்கப்பட்ட விதை அளவு, விதைப்பு ஆழம், தாவர இடைவெளி மற்றும் சரியான விதைப்புக் காலத்தைப் பின்பற்றுவது சீரான வளர்ச்சி மற்றும் உயர்தர விதை உற்பத்திக்கு அவசியமாகும்.
5. கலவன்நீக்குதல் (Roguing):
ரகத்திற்குப் பொருந்தாத, நோயுற்ற மற்றும் விரும்பத்தகாத தாவரங்களை அகற்றி, விதைப் பயிரின் மரபியல் தூய்மையைப் பராமரிக்க வேண்டும்.
6. உர மேலாண்மை:
பயிரின் தேவைக்கேற்ப சமச்சீரான ஊட்டச்சத்துக்களை வழங்குவதன் மூலம் விதைகளின் வீரியம், முளைப்புத்திறன் மற்றும் தரத்தை மேம்படுத்தலாம்.
7. நீர் மேலாண்மை:
பயிரின் வளர்ச்சி நிலைகளுக்கு ஏற்ப தேவையான அளவு நீரை வழங்கி, அதிக நீர்ப்பாசனம் அல்லது நீர் பற்றாக்குறையைத் தவிர்க்க வேண்டும்.
8. பூச்சி மற்றும் நோய் மேலாண்மை:
பூச்சி மற்றும் நோய் தாக்கங்களைத் திறம்படக் கட்டுப்படுத்துவதன் மூலம் விதையின் தரம், வீரியம் மற்றும் முளைப்புத்திறனைப் பாதுகாக்கலாம்.
9. பூக்கும் கால ஒத்திசைவு (Synchronization):
கலப்பின விதை உற்பத்தியில், ஆண் மற்றும் பெண் பெற்றோர் வரிசைகள் ஒரே நேரத்தில் பூப்பதை உறுதி செய்வதே பூக்கும் கால ஒத்திசைவு ஆகும். இது மகரந்தச்சேர்க்கையை அதிகரித்து, விதை மகசூல் மற்றும் தரத்தை மேம்படுத்துகிறது. இதற்காக விதைப்பு தேதி, நீர்ப்பாசனம், உர மேலாண்மை மற்றும் வளர்ச்சி ஊக்கிகள் ஆகியவை தேவைக்கேற்ப பயன்படுத்தப்படுகின்றன.
10. துணை மகரந்தச்சேர்க்கை (Supplementary Pollination):
கலப்பின விதை உற்பத்தியில் மகரந்தச்சேர்க்கையை அதிகரிக்க மேற்கொள்ளப்படும் கூடுதல் நடவடிக்கைகள் துணை மகரந்தச்சேர்க்கை எனப்படும். கயிறு இழுத்தல், தாவரங்களை மெதுவாக அசைத்தல், காற்றோட்டத்தை ஏற்படுத்துதல் மற்றும் மகரந்தச்சேர்க்கை பூச்சிகளைப் பயன்படுத்துதல் போன்ற முறைகள் இதற்கு உதவுகின்றன.
11. வயல் ஆய்வு மற்றும் சான்றளிப்பு:
விதை உற்பத்தி வயல்கள் பல்வேறு வளர்ச்சி நிலைகளில் ஆய்வு செய்யப்பட்டு, மரபியல் தூய்மை மற்றும் தரநிலைகள் சரிபார்க்கப்படுகின்றன. அனைத்து தரநிலைகளையும் பூர்த்தி செய்யும் விதைகளுக்கே சான்றிதழ் வழங்கப்படுகிறது.
12. அறுவடை:
விதைகள் முழுமையான உடலியல் முதிர்ச்சி அடைந்த பின்னர் சரியான நேரத்தில் அறுவடை செய்ய வேண்டும். இதன் மூலம் அதிக முளைப்புத்திறன், வீரியம் மற்றும் சேமிப்புத் திறன் கொண்ட விதைகளைப் பெறலாம்.
13. உலர்த்துதல்:
அறுவடைக்குப் பிறகு விதைகளில் உள்ள அதிகப்படியான ஈரப்பதத்தை நீக்குவதற்காக சரியான முறையில் உலர்த்த வேண்டும்.
உலர்த்தும் முறைகள்:
· நிழல் உலர்த்துதல் (Shade Drying): காய்கறி மற்றும் தோட்டக்கலை விதைகளுக்கு ஏற்றது.
· வெயில் உலர்த்துதல் (Sun Drying): நெல், கோதுமை, பயறு வகைகள் போன்றவற்றிற்கு பொதுவாகப் பயன்படுத்தப்படுகிறது.
· இயந்திர உலர்த்துதல் (Mechanical Drying): பெரிய அளவிலான விதை உற்பத்தியில் கட்டுப்படுத்தப்பட்ட வெப்பநிலையில் மேற்கொள்ளப்படுகிறது.
14. சுத்தம் செய்தல்:
கற்கள், மண், களைவிதைகள் மற்றும் சேதமடைந்த விதைகள் போன்ற அசுத்தங்களை அகற்றி, விதைகளின் உடல் தூய்மையை உறுதி செய்வதே சுத்தம் செய்தல் ஆகும்.
15. தரப்படுத்துதல் (Grading):
விதைகளை அளவு, எடை மற்றும் தரத்தின் அடிப்படையில் பிரித்து தேர்வு செய்வது தரப்படுத்துதல் ஆகும். இது ஒரே தரமான விதைத் தொகுதிகளை உருவாக்க உதவுகிறது.
16. விதை நேர்த்தி (Seed Treatment):
விதைகளை விதைப்பதற்கு முன் பூஞ்சாணக் கொல்லிகள் (Trichoderma viride, Carbendazim), உயிர் உரங்கள் (Azospirillum, Rhizobium, Phosphobacteria) மற்றும் வளர்ச்சி ஊக்கிகள் (GA₃, Humic acid, Panchagavya) போன்ற பொருட்களால் சிகிச்சையளிப்பதே விதை நேர்த்தி ஆகும். இது விதைகளை நோய் மற்றும் பூச்சி தாக்கத்திலிருந்து பாதுகாப்பதோடு, முளைப்புத்திறன், விதை வீரியம் மற்றும் ஆரம்பகால வளர்ச்சியையும் மேம்படுத்துகிறது.
17. சேமிப்பு:
விதைகளின் முளைப்புத்திறன், வீரியம் மற்றும் தரத்தை நீண்ட காலம் பாதுகாக்க, அவற்றை 8–12% ஈரப்பதம் மற்றும் குளிர்ந்த, உலர்ந்த சூழலில் (20–25°C-க்கும் குறைவான வெப்பநிலையில்) சேமிக்க வேண்டும்.
தரமான விதை உற்பத்தி என்பது நவீன விவசாயத்தின் முதுகெலும்பாகும். சரியான ரகத் தேர்வு முதல் அறுவடை மற்றும் சேமிப்பு வரை அனைத்து தொழில்நுட்பங்களையும் முறையாகப் பின்பற்றினால் மட்டுமே உயர்தர விதைகளை உற்பத்தி செய்ய முடியும். தரமான விதைகள் அதிக மகசூல், நிலையான உற்பத்தி மற்றும் விவசாயிகளின் வருமான உயர்வை உறுதி செய்வதுடன், நாட்டின் உணவுப் பாதுகாப்பிற்கும் வலுவான அடித்தளமாக அமைகின்றன.
‘
வளமானஎதிர்காலத்தைஅறுவடைசெய்வோம்
